प्रचण्ड सरकारका प्रमुख सत्तासाझेदार दलका सभापति देउवाले जेठमा स्थानीय तहको निर्वाचन गर्न नसके सरकार ढाल्ने चेतावनी दिएको स्रोतको दावी छ । आगामी चैतमा स्थानीय तहको निर्वाचन गरी देउवालाई सरकार हस्तान्तरण गर्ने माओवादी कांग्रेसको सहमति थियो । उक्त सहमति अनुसार प्रचण्ड सरकारको आयु अब ४ महिना मात्रै बाँकी छ । जनप्रहार साप्ताहिकले समाचार छापेको छ ।
केही दिनअघि बालुवाटारमा भएको भेटमा देउवाले अन्य कामलाई थाती राखेर भए पनि सरकार निर्वाचनको मिति घोषणा गर्ने बाटोमा अघि बढ्नुपर्ने बताएका थिए । ‘चैतसम्मलाई भनेर प्रधानमन्त्री बन्नुभो, अब जेठसम्म हुने निश्चित भयो, त्यसपछि पनि कुर्नुप-यो भने त सकिन्न होला, जेठमा चुनाव गर्ने गरी तयारी थाल्नुप-यो प्रचण्डजी’ देउवाले हाँस्दै प्रचण्डलाई भनेका थिए ।
स्रोतका अनुसार प्रचण्डले पनि हाँसोमै जवाफ फर्काउँदै ‘जेठमा नभए के भो त मंसिरमा स्थानीय र प्रदेशको गरौँला, त्यसपछि तपाई २ वर्ष ढुक्कले चलाउनुस्’ भनेका थिए । तर देउवा र प्रचण्डबीच स्थानीय तहको निर्वाचन जुनसुकै हालतमा जेठभित्र गर्ने समझदारी भएको छ ।
भेटका क्रममा देउवाले आफूलाई पार्टीभित्रैबाट दबाब पर्न थालेको भन्दै चुनावको मिति घोषणा गर्न सहमति खोज्न ढिलाई गर्न नहुने भनाई राखेका थिए । प्रचण्डले आफू चुनावको वातावरण बनाउन दिनरात लागिरहेको जानकारी गराउँदै सरकारमा बसिरहन आफूलाई मन नभएको बताएका थिए ।
‘चुनाव गराएर तपाईलाई प्रधानमन्त्री बनाउने सहमति अनुरुप अघि बढ्नुपर्ने कुरामा म दुईमत छैन, जुन दिन चुनाव हुन्छ त्यसको भोलिपल्ट नै म राजीनामा दिन्छु, मलाई सरकारमा बसिरहन मन छैन’ प्रचण्डले भनेका थिए । स्रोतका अनुसार प्रचण्ड देउवाले एमालेलाई सरकारबाट केही वर्ष बाहिरै राख्नुपर्ने विषयमा समेत कुरा गरेका थिए ।
एमालेले हाल देखाइरहेको प्रवृत्तिले उ सत्तारबाहिर बस्नै नसक्ने कुराको पुष्टि भएकाले केही वर्ष एमालेलाई सत्ताबाहिर राखे मुलुकको विकास हुन सक्ने भनाई देउवाले राखेका थिए ।
प्रचण्डले भने देशमा देखिने राजनीतिक तथा अन्य समस्या समाधानको लागि एममालेको साथ अनिवार्य भएकाले तत्काल एमालेलाई चिढ्याउन नहुने भनाई राखेका थिए । अन्तिममा देउवाले जेठमा चुनाव नभए धेरै समय पर्खिन नसक्ने प्रष्ट पारेको स्रोतको भनाई छ ।
No comments:
Post a Comment