एसएसपी खत्रीको सुन काण्ड : तस्करीका लागि तीनवटा नम्बर र भाइबर, स्काईपको प्रयोग

काठमाडौँ, २४ माघ – सुन तस्करीको अभियोगमा प्रहरी मुख्यालयबाट पक्राउ परेका एसएसपी श्याम खत्रीले विभिन्न फरक फरक नम्बरका तीन नम्बरबाट भन्सारमा कार्यरत भन्सार अधिकृत श्रीनारायण यादवसँग बारम्बार सम्र्पकमा रहेको देखाएको छ।

ब्युरो स्रोतका अनुसार सुन तस्करीको अन्तर्राष्ट्रिय गिरोहसँगको सेटिङमा संग्लनहरु भाइबर र स्काईप मार्फत सम्पर्कमा रहेको कारण ब्युरोको अनुसन्धानमा कठिनाई भइरहेको थियो। विमानस्थलको एक्सरे मेसिन सँगै बस्ने तथ्यांक अधिकृत श्रीनारायण यादवले बयानका क्रममा एसएसपी खत्रीको नाम पोलेको थिए।

यादवकै बयानका आधारमा ब्युरोले दुईबीचको टेलिफोन सम्पर्कको जालो केलाएको थियो। उच्च स्रोत भन्छ, ’प्रत्येक दिन उनीहरुबीच तस्करीको सुन कसरी बाहिर पठाउने भन्नेबारे कुराकानी भएको देखिन्छ।’ विमानस्थल भन्सार स्रोतका अनुसार यसअघि नै पक्राउ परेका यादव आठ वर्षभन्दा लामो समयदेखि विमानस्थलमा कार्यरत थिए।
एसएसपी खत्री भने पछिल्लो १४ महिनायता विमानस्थलमा कार्यरत थिए। केन्द्रिय अनुसन्धान ब्युरोले अहिलेसम्म तस्करीको संग्लन रहेको आरोपमा नौ जनालाई पक्राउ गरिसकेको छ। जनकराज सापकोटाको बाईलाईनमा कान्तिपुर दैनिकले खबर छापेको छ।