युएईमा नर्सको कमाइ ५ लाख रुपैयाँसम्म


युएई – खाडीका विभिन्न देशहरुमध्ये नेपाली कामदारका लागि राम्रो मानिने युएईमा नेपाली नर्सले ५ लाख रुपैयाँसम्म कमाउने गरेका छन् । विगत ६ वर्षदेखि युएईमा नर्सिङ पेशा अपनाइरहेकी काठमाडौंकी सुर्या लक्ष्मी मानन्धरले यहाँका सरकारी अस्पतालमा नर्सका लागि राम्रो अवसर रहेको बताइन् ।
उनका अनुसार यहाँका अस्पतालमा काम गर्नका लागि दुबई हेल्थ अथोरिटी वा अवुधावीमा भए त्यहाँको यस्तै संयन्त्रको लाइसेन्स लिनुपर्छ । जुन अनलाइन फर्म भरेर नेपालबाटै दिन मिल्ने उनले बताएकी छिन् ।
नर्सले रसिजष्ट्रेसनका लागि फर्म भने ब्याचुलर लेभलको नर्सिङ गरेर कम्तिमा एक वर्ष नेपालकै अस्पतालमा काम गरेको अनुभव हुनुपर्छ । युएईमा धेरै एजेन्सीले राम्रो अवसर भनेर होम नर्सिङमा पठाउने भएकाले सचेत रहन आग्रह गरेकी छिन् । उनले भनिन्, ‘होम नर्सिङका लागि लाइसेन्स चाहिँदैन । तर, त्यहाँ त्यति राम्रो हुँदैन ।’
भर्खरै पनि केही एजेन्सीले दुबईका अस्पतालका लागि नर्स चाहिएको भनेर बिज्ञापन गरेको र आफूले बुझ्दा त्यस्तो नरहेको बताइन् । उनले भनिन्, ‘कति दिदिबहिनी नबुझेर आउने भएकाले दुःख पाएको कुरा बेला–बेला सुनिन्छ ।’
दुबईका अस्पतालमा काम गर्दा नर्सले १ लाख २० हजारदेखि ५ लाखसम्म पारिश्रमिक पाउने उनले जानकारी दिइन् ।स्वास्थ्य खबरपत्रिकाको सहयोगमा