काकीले गरिन् तीन वर्षका भतिजको घाँटी थिचेर हत्या, कारण खोज्दै प्रहरी

सप्तरी, माघ २४ – सप्तरी जिल्लाको पातो गाविसमा तीन वर्षका बालकलाई आफ्नै काकीले घाँटी निमोठेर हत्या गरेकी छिन् । पातो गाविस–६ का रामदेव मण्डलका तीन वर्षका छोरा रामअवतारको हत्या भएको हो ।
रामअवतारलाई काकी उर्मिलादेवी मण्डलले घाटी थिचेर तथा निमोठेर हत्या गरेको जिल्ला प्रहरी कार्यालय सप्तरीका प्रहरी निरीक्षक विजय श्रेष्ठले जानकारी दिनुभएको छ । उर्मिलादेवीलाई प्रहरीले नियन्त्रणमा लिएको छ । हत्याको कारणबारे प्रहरीले अनुसन्धान गरिरहेको छ ।
अाइतबार बिहानैदेखि हराइरहेका बालकको मृत शरीर बेलुका घर नजिकै बारीमा फेला परेको थियो । गएको मंसिरमा पनि आफ्नै छिमेकीले सप्तरीको हरिपुर गाविस-३ का आठ वर्षका बालक दुर्गानन्द साहको घाँटी थिचेर हत्या गरेका थिए ।
उज्यालो अनलाइनको सहयोगमा