बालुवाटारमा शुक्रबार राति सम्पन्न प्रधानमन्त्री र मधेसी मोर्चाका नेताहरूबीच भएको वार्तामा प्रधानमन्त्री दाहालले ‘मधेस मोर्चा’को सहमति नहुँदासम्म चुनावको मिति घोषणा हुँदैन भनेर आश्वासन दिएको उच्च स्रोतले जनाएको छ । माओवादी केन्द्रका नेता मातृका यादवले पनि प्रधानमन्त्रीले सहमतिमा निर्वाचनको मिति घोषणा गर्ने भन्दै मधेसको समस्या पहिला हल हुनुपर्ने बताए ।
यादवले भने, ‘सरकारले मधेसी मोर्चा र एमालेसँग पनि छलफल गर्नेछ । सबैलाई मिलाएर लैजाने बालुवाटार बैठकको सहमति छ ।’
बैठकमा प्रधानमन्त्री दाहालको भनाइ उदृत गर्दै स्रोतले भन्यो, ‘मन्त्रिपरिषदको बैठकमा मैले नबोलेको कुरा पत्रपत्रिकामा कसरी आयो ? म आश्चर्य चकित बनेको छु । मैले चुनाव गर्ने भनेको हुँ । स्थानीय तह वा निकाय यी दुबै शब्द उच्चारण गरेको थिइन् । तपाईहरू ढुक्क हुनुस् मधेसी मोर्चाले नमान्दासम्म चुनावको मिति घोषण हुँदैन ।’
मोर्चासँगको बैठकमा प्रधानमन्त्री दाहालले एमालेसँग पनि सहमतिको प्रयास भइरहेको बताएका थिए । तर, उनले कांग्रेसले चुनावको मिति घोषणा गर्न दबाब दिइरहेको घुमाउरो भाषामा मोर्चाका नेताहरू समक्ष असन्तुष्टि जनाएका थिए ।
‘कांग्रेसले चुनावको मिति छिटो घोषणा गरौँ भनिरहेको छ’, प्रधानमन्त्री दाहालको भनाइ उदृत गर्दै उच्च स्रोतले भन्यो, ‘एमाले र मधेसी मोर्चालाई पनि सहमतिमा ल्याउनु पर्छ भनेको छु । संविधान संशोधन भएपछि मात्रै चुनावको मिति घोषणा हुन्छ ।’
प्रधानमन्त्री दाहालले निर्वाचनको मिति घोषणाका विषयमा आफूसँग भएको सहमति विपरित अभिव्यक्ति दिएको भन्दै कांग्रेस नेताहरू शसंकित बनेका छन् । कांग्रेसका एक केन्द्रीय सदस्यले नाम उल्लेख नगर्ने सर्तमा भने, ‘प्रचण्डजीको कुरामा कुनै भर छैन । उनले कांग्रेससँगको भद्र सहमतिलाई तोड्छन् कि भन्ने आशंका पनि उब्जिएको छ । अब चैतभित्र पनि चुनाव होला जस्तो छैन ।’
बैठकमा मधेसी मोर्चाका नेताहरूलाई प्रधानमन्त्री दाहालले लठ्ठै बनाउने गरेर लामै भाषण दिएको स्रोतले जानकारी दियो । ‘प्रधानमन्त्रीज्यूले शुक्रबार रातिको बैठकमा मधेसी मोर्चाले मागेका कुराभन्दा पनि धेरै माग पूरा गर्ने आश्वासन पो दिनुभयो । उहाँले त हामीले सोँचेभन्दा पनि धेरै कुरा बोल्नुभयो । हामी त दङ्ग परेर आएका छौँ ।’
प्रधानमन्त्री दाहालले बालुवाटार बैठकमा मधेसी मोर्चाका शीर्ष र आफ्नो दल माओवादी केन्द्रका सीमित नेताहरूलाई बोलाएका थिए ।
No comments:
Post a Comment