दलाइ लामा आउने भएपछि भ्रमण रद्द

काठमाडौः भारतको कर्नाटक विधानसभाले आयोजना गरेको महिला सांसद सम्मेलनमा सहभागी हुन अन्तिम तयारी गरिरहेका १५ नेपाली महिला सांसदको टोलीलाई उक्त अवसरमा तिब्बती शरणार्थी नेता दलाइ लामा पनि उपस्थित हुने जानकारी पाएपछि सभामुख ओनसरी घर्तीमगरले भ्रमण रोक्न निर्देशन गरेकी छन् ।

कर्नाटक प्रान्तीय विधानसभाले सभामुख घर्तीमगरसहित सांसदहरूलाई उक्त कार्यक्रममा सहभागिताका लागि निमन्त्रणा गरेको थियो । सभामुख घर्तीमगरले आफू उपस्थित हुन नसक्ने भन्दै विभिन्न दलका १५ जना सांसदलाई उक्त कार्यक्रममा पठाउने तयारी गरेकी थिइन् । तर भारतस्थित नेपाली राजदूत र आयोजकसँग बुझ्दा उक्त कार्यक्रममा दलाइ लामा र उनका प्रतिनिधि उपस्थित हुने जानकारी पाएपछि सभामुख घर्तीमगरले सांसदहरूलाई पनि नपठाउने निर्णय गरेको संसद् सचिवालय स्रोतले बतायो ।

कर्नाटक विधानसभाद्वारा आमन्त्रण गरिएको उक्त कार्यक्रममा सांसदहरूको सहभागिताका लागि कांग्रेसका स्वर्गीय नेता सुशील कोइरालाका नाममा स्थापित ‘सुशील कोइराला फाउन्डेसन’ का सचिव अतुल कोइरालाले संसद् सचिवालय र सभामुख घर्तीमगरको निजी सचिवालयसँग संयोजन गरेका थिए । तर सम्मेलनमा दलाइ लामा उपस्थित हुनेबारे कोइरालाले केही पनि उल्लेख नगरेपछि सभामुख घर्तीमगरले कांग्रेस, एमाले, माओवादी केन्द्र र अन्य दलका प्रमुख सचेतकसँग छलफल गरी त्यहाँ पठाउने १५ जना सांसदको नाम तय गर्न लगाएकी थिइन् ।

जसअनुसार कांग्रेस र एमालेका तर्फबाट ४÷४ जना, माओवादी केन्द्रका ३ जना, राप्रपाबाट एकजना र अन्य साना दललाई पनि समेटेर १५ जना सांसदको नाम तय गरिएको थियो । सम्मेलनमा दलाइ लामा उपस्थित हुने जानकारी पाएपछि सम्मेलनमा पठाउन लागिएका कांग्रेसकी उषा गुरुङ, एमालेकी सुशीला नेपाल, माओवादी केन्द्रकी रूपा महर्जन, राप्रपाकी कान्ता भट्टराई, संघीय समाजवादी फोरमकी छायाँ पन्तलगायत सांसदलाई भ्रमण स्थगित भएको जानकारी संसद् सचिवालयले गराएको स्रोतले बतायो । फेब्रुअरी ८ तारिखदेखि उक्त सम्मेलन सुरु हुँदैछ ।

सम्मेलनमा विवाद उत्पन्न हुनसक्ने सम्भावना रहेकाले सांसदहरुलाई भ्रमणमा नपठाउने निर्णय ।
नेपाल एक चीन नीतिका पक्षमा रहेकाले दलाइ लामा उपस्थित हुने कार्यक्रममा सहभागिता जनाउँदा छिमेकी मुलुक चीनले आपत्ति जनाउन सक्ने भन्दै सम्मेलनमा सहभागिता नजनाउने निर्णय गरिएको संसद् सचिवालयका अधिकारीहरू बताउँछन् । ‘सम्मेलनमा सांसदहरू जाने तयारी भैसकेको थियो । तर विभिन्न स्रोतबाट बुझ्दा त्यो सम्मेलनबारे विवाद उत्पन्न हुनसक्ने सम्भावना रहेकाले सांसदहरूलाई भ्रमणमा नपठाउने निर्णय गरिएको हो’, सभामुख घर्तीमगरका प्रेस सल्लाहकार बबिन शर्माले अन्नपूर्णसँग भने ।

सभामुख घर्तीमगरले प्रमुख दलका प्रमुख सचेतकसँग सांसदहरूको भ्रमण स्थगित भएको जानकारी बुधबार गराएकी थिइन् । विघटित पहिलो संविधानसभाका बेला तत्कालीन फोरमका सांसद बीपी यादवको नेतृत्वमा रुक्मिणी चौधरीलगायत सांसदले दलाई लामाको आश्रममा गएर भेट गर्दा चीनले संसद् सचिवालयसँग पटकपटक चासो देखाएको थियो । तीमध्ये केही सांसद दोस्रो संविधानसभामा दोहोरिएपछि ‘उनीहरूको पद के हुन्छ’ भनी चिनियाँ प्रतिनिधिले तत्कालीन सभामुख सुवास नेम्बाङ र संसद् सचिवालयका महासचिव मनोहरप्रसाद भट्टराईसँग चासो व्यक्त गर्दै आएका थिए ।

यसअघि भारतकै गोवामा इन्डिया फाउन्डेसनद्वारा आयोजित सम्मेलनमा दलाइ लामाका प्रतिनिधि सहभागी कार्यक्रममा कांग्रेस सभापति शेरबहादुर देउवा उपस्थित भए/नभएको विषय पनि विवादमा परेको थियो । तर देउवाले भने उक्त कार्यक्रममा दलाइ लामाका प्रतिनिधिसँग आफूले भेट नगरेको दाबी गरेका थिए ।