पशुपतिनाथमा बिहानै माधवनारायण ब्रतालु (फोटो फिचर)

पशुपतिनाथ मन्दिरस्थित वाग्मती नदीमा शुक्रबार बिहान राताम्ये भएका श्रद्धालुहरुको भीड थियो ।पौराणिक सहर साँखुमा पुस २८ गतेदेखि सुरु भएको माधवनारायण स्वस्थानीका ब्रतालुहरु बिहीबार साँझ पशुपतिनाथ आएका हुन् । एक महिने माधवनारायण स्वस्थानीका ब्रतालुहरु एवं रितले उपत्यकाका अन्य नदी तलाउमा पनि यसैगरी पूजापाठ तथा स्नान गर्छन् ।

पौष शुक्ल पूर्णिमादेखि सुरु भएको ब्रत माघ शुक्ल पूर्णिमासम्म लाग्नेछ ।माधवनारायणको व्रत बस्ने व्रतालुले पूर्णिमाको अघिल्लो दिन हात/गोडाको नङ्ग काटी, एकचित्त भई, निराहार बस्ने, पूर्णिमाको बिहानै नदीमा स्नान गरी पूजा गर्ने, शङ्खजल ग्रहण गरी मन्त्रोच्चारण गर्ने प्रचलन छ । मन्त्रोच्चारण गरेपछि शङ्खजल ग्रहण गरेपछि कसैलाई छुन नहुने तथा जुत्ता लगाउन नहुने परम्परा छ ।

यस वर्ष १५ पुरुषसहित १ सय ९३ व्रतालु छन् । व्रत बसेका सबै आइपुगेपछि मात्र अरू काम सुरु हुन्छ । सबैले एकैपटक अध्यारो छँदै स्नान गर्नुपर्ने, व्रत बसेकाले जुत्ता लगाउने कसैलाई छुन नहुने, रातो वस्त्र मात्र लगाउनुपर्ने, आफूले पनि जुत्ता, चप्पल लगाउन नहुने, एक महिनाभर नुन बार्ने र दूध, घिउ, चाकु, रातो मुला, सुन्तलाजस्ता खाद्यान्न मात्र भोजनका रूपमा ग्रहण गर्नुपर्ने परम्परा रहेकाले यो कठिन मानिन्छ । तर, नियममा रही व्रत बसे मनोकांक्षा पूर्ण हुने विश्वास छ ।